Laxeiro (José Otero Abeledo, Lalín, 1908-Vigo, 1996) é un dos pintores máis relevantes da arte galega do século XX. Membro destacado do grupo coñecido como "Os Novos", Laxeiro foi un dos responsables da introdución da arte galega na contemporaneidade. A súa prodixiosa imaxinación, o seu talento plástico e a súa capacidade para reinterpretar a cultura popular en clave contemporánea, fixeron da súa obra un legado sen o que non se podería entender a cultura galega actual.